Davvimáilmmi geassi lea čuovgat ja oanehaš, ja danin hui intensiivvalaš. Geasi lohket álgit Sámis mihcamáraid rájes. Dalle jalges duoddara fávrrut – čuvges lieđđedaŋas ja rukseslieđat duolbadaŋas leat alimus lieđis. Mihcamáraid rájes álgá maiddái divreáigi, goas leat erenoamáš valjis varranjammi divrenálit. Divreborriide dát lea valljás áigodat, muhto eanaš eará ealliide, dego bohccuide, divreáigi lea hui givssálaš áigodat.

Divrin badjeolmmoš sáhttá  álkibut čohkket bohccuid badjosiidda miessemearkuma várás. Ovdalaš áiggiid miessemearkumii vázziluvvui noađđehearggit lávžegeažis, dán áigge mannojuvvo njealjejuvllagiiguin. Miessemearkun ijahis ija čuovggas lea ainge máŋggain bálgosiin okta boazojagi alimus bottuin.