Čoakkáldatbálvalusat
”Govva muitala eanet go duhát sáni. Man ollu eanet dasto muitalit duođalaš, anus leamaš dávvirat? Dávvir ii muital dušše iežas oamasteaddjis, ovttaskas olbmos, muhto maiddái viidáseappot iežas birrasis, vuogáiduvvamis luonddu ja kultuvrra gáibádusaide. Mis sámiin ii sáhte leat kalebassa, muhto almmatge sáhttá leat náhppi dahje guksi ...” (*).
Sámemusea čoakkáldagaide gullet dávvirčoakkáldagat, čuovgagovvačoakkáldagat, arkiivačoakkáldat, giehtagirjerádju ja olgomusea. Čoakkáldagaid dávvirat gusket ássamii, johtimii, fievrridanvugiide, gárvodeapmái, giehtaduodjái ja jáhkko-, osko- ja dáhpekultuvrii. Sámemusea lea maiddái sámi dáiddamusea, mii vurke iežas čoakkáldagaide sámedáidaga.
Jos áigu oahpásmuvvat dávvirčoakkáldagaide dahje čuovgagovvačoakkáldagaide, de áššis galgá soahpat čoakkáldatamanuenssain uhcimustá vahku ovdal jurddašuvvon oahpásmuvvama. Áššehas galgá maiddái govttolaš dárkilit muitalit, maid háliida oaidnit. Dutkama viidodaga mielde bivddan sáhttá dohkkehuvvot telefovnna dahje šleađgapoastta bokte soahpan, muhto muhtumin sáhttá gáibiduvvot dasa lassin čálalaš bivdda ja doarvái guhkes guorahallanáigi, dasgo dihto materiálaide oahpásmuvvamii sáhttá dárbbašuvvot maiddái eará institušuvnnaid dahje priváhtaolbmuid lohpi. Go dutkanbivdda lea dohkkehuvvon, de sohppojuvvo áššehasain, goas ja gos dutkan dahkkojuvvo. Prinsihppan lea dat, ahte dutkan ii dáhpáhuva čoakkáldatsajis, muhto dutkanvuloš materiála sirdojuvvo eará sadjái guorahallanláhkai.
Sámemusea čoakkáldat- ja diehtobálvalusat leat rabas vu - pe 9.00 – 16.00. Ášši dikšumis galgá soahpat ovddalgihtii, tel. 0400 891 860.
Lassedieđut:
Amanuensa Áile Aikio, tel. 0400 891 860, aile.aikio(at)samimuseum.fi
*) Samuli Aikio (Luobbal-Sámmol Sámmol), Siiddastallan - Siidoista kyliin. Doimm. Pennanen-Näkkäläjärvi.
turismainfo
