Anára márkanbáikki kultuvrra johtolagat ja mearkkat
Bearjadat 26. Borgemánnuta 2011, 13.24Eurohpá huksenárbebeaivvi 7.9.2011 temán lea dán jagi "kultuvrra johtolagat". Anára gieldda huksenárbebeaivi álgá Avvilis, gos dolle oahpistuvvon bussesáhttu Anára márkanbáikái. Oahpisteaddjin dán bussemátkki áigge doibmet báikkálašdovdi Matti Lehtola sihke Sámi Oahpahusguovddáža turismalinnjá oahppit.
Anáris oahpistanmátki joatkašuvvá Oahpahusguovddáža ođđa Lassi-goađis, gos sáhttá govaiguin ja muitalemiid bokte oahpásmuvvat Anára márkana huksenárbái ja kultuvrraid johtolagaide. Goađis vulgojuvvo dasto Anára ovddeš vuolledási lahkosiidda, gos vázzojuvvo searvegottedállui. Eahkedis dán mátkki maŋŋá guossohuvvo vel káffe.
Eahkeda mielde olbmot besset oahpásmuvvat sihke Gihttela riidengeidnui ja Ohcejoga riidengeidnui ja seammás muitaluvvo Juvdujoga, Jogaid Joga mearkkašumis kultuvrra johtolahkan.
Eurohpá huksenárbebeaivvi ulbmilin lea bargat dan ovdii ahte olbmot buorebut dovdagohtet ja árvvusatnigohtet huksenkultuvrra. Kultuvrra johtolaga temá bokte láidestuvvojit ja movttiidahttojit olbmot geahčadit birraseaset, lohkat iežaset birrasa ja guldalit mii birrasis lea sidjiide muitalanláhkai.
Eurohpá huksenárbebeaivvi lágidit searválagaid Sámi Oahpahusguovddáš, Anára gielda ja Sámemusea Siida. Bussesáhttu Avvilis vuolgá 7.9. 2011 dbm 16.00 ja Lassi-goađis álggahuvvo dbm 17.00. Almmut iežat dán dáhpáhussii Irma Lehtolai 040-7237283 2.9.2011 rádjai.
Buresboahtin! Nuvttá!
Siida – Sámemusea ja luondduguovddáš, Inarintie 46, FI-99870 Anár, tel. +358 (0)400 898 212, fax +358 (0)205 64 77 50, www.siida.fi, siida@samimuseum.fi, siida@metsa.fi
Siiddas rabas uvssaid beaivi miessemánus
Sámemusea álggaha čájáhusdoaimma Ohcejogas
turismainfo
