Boares dávviriid dikšun ja seailluheapmi -dáhpáhus Siiddas
Maŋŋebárga 17. Miessemánnuta 2011, 14.59Háliidatgo diehtit, mo boares dávvirat seailluhuvvojit? Mo dikšojuvvojit ja seailluhuvvojit silbadávvirat? Leatgo alumiidna ja sálti čoavddus čáhpodan silbačiŋaide, galmmihanskáhpesgo čiŋat seailluhuvvojit? Mo báhkkejuvvojit silkkit? Mo gieđahallat ja seailluhit muorrabiergasiid? Maid bargat boares sistegápmagiidda?
Dáid gažaldagaide gávdnojit vástádusat Siiddas riikkaidgaskasaš museabeaivve 18.5.2011. Musea bargit čájehit čoakkáldagaide gulavaš dávviriid vehkiin tekstiillaid, muorra- ja silbadávviriid dikšun- ja seailluhanvugiid.
Dáhpáhusas ságastallan ja dieđuid lonuheapmi leat guovddáš sajis. Musea háliida oahpásmuhttit olbmuid museačoakkáldagaide ja daid dikšumii. Dáhpáhusas bohtet oahpisin maiddái musea erenomáš dáiddut nugo konserveren, dávviriid teknihkalaš dikšun ja fuolaheapmi. Dieđut leat ávkkálaččat buohkaide, geain leat seailluhusas boares ja divrras dávvirat, maid háliidit seailut. Oktan dárkkuhussan leage fállat dieđuid dávviriid, eandalitge boares ja váttis diŋggaid seailluheamis ruovttus dorvvolaččat.
Beaivi lea dárkkuhuvvon sámeduojáriidda ja berošteaddjiide ja maiddái suorggi studeanttaidda (Sakk), muhto nuppe dáfus maiddái buohkaide, geat leat beroštuvvan sámi kulturárbbis, dávviriin dahje boares dávviriin oppalohkkái.
Iđitbeaivve 18.5.2011 lea prográmma Sámi oahpahusguovddáža oahppiide ja eahkedis dmu 18.00 rájes lea álbmotdilálašvuohta. Eahketdilálašvuohta lea suoma- ja davvisámegielat. Dulkon ordnejuvvon.
Boađe oaidnit, vásihit ja ságastallat!
Siiddas leat riikkaidgaskasaš museabeaivve rabas uvssat dmu 10-17.
Siida – Sámemusea ja luondduguovddáš, Inarintie 46, FI-99870 Anár, tel. +358 (0)400 898 212, fax +358 (0)205 64 77 50, www.siida.fi, siida@samimuseum.fi, siida@metsa.fi
Siiddas rabas uvssaid beaivi miessemánus
Sámemusea álggaha čájáhusdoaimma Ohcejogas
turismainfo
