Siida geasi áigge rabas beaivválaččat

Siidda geasseáigodat álgá gaskavahku geassemánu 1. beaivve. Geasi áigge Siida lea rabas beaivválaččat diibmu 9 – 20. Sisabeassanbileahta haddái gullevaš muldimediaovdanbuktin ”Aurora borealis” lea oaidnimis beaivválaččat diibmu 11, 14 ja 17, jos auditorio ii leat várrejuvvon eará atnui. Restoráŋŋa Sarrit lea rabas Siidda rabasáiggiid mielde, ja beaivebiepmu fidne iešbálvalanbeavddis juohke beaivve diibmu 11–15. Geasi áigge restoráŋŋas fidne maiddái A la carte -biepmuid. Joavkovárremat galget dahkkojuvvot ovddalgihtii.

1.6. rahppojuvvo maiddái Siidii gullevaš historjjálaš olgomusea. Olgomuseas sáhttá oahpásmuvvat sámiid ovddeš ássanhámiide ja bivdovugiide. Áidnalunddot čuozáhagat olgomuseas leat earret eará Tirro šilljobirrasii gullan álgoálgosaš visttit 1800-logus. Olgomuseaguovllu birra johtti bálgá guhkkodat lea sullii 800 m. Bálgá guoras leat lagabui 50 oahpásmuvvančuozáhaga.

Sámemusea guovlodoaibmabáiki Čeavetjávrris – Nuortalaččaid árbevierrodállu – rahppojuvvo vuot olbmuide geasiáigái. Árbevierrodálu rabasáigi lea uhccánaš guhkiduvvon, ja dállu lea dán jage rabas gitta 25.9. rádjai.  Nuortalaččaid Árbevierrodállu muitala Čeavetjávrri nuortalaččaid historjjás. Árbevierrodálu lassin dakko lahkosiin lea olgomusea, mas sáhttá oahpásmuvvat nuortalaččaid Suenjela áigásaš geassebáikái. Árbevierrodálus lea maiddái museabuvddaš, mas sáhttá oastit nuortalaš giehtadujiid sihke girjjálašvuođa. Nuortalaččaid árbevierrodállu lea rabas beaivválaččat diibmu kello 9 – 17. Dasa beassá nuvttá sisa. 

Meahciráđđehusa luonddustobut Leammis ja Ohcejogas rahppojuvvojit geassemánus. Luonddustobuin fidne dieđuid fiinna luonddus ja luonddudilálašvuođain sihke vánddardanvejolašvuođain. Luonddustobuin sáhttá háhkat maiddái guolástanlobiid. Goappáge luonddustobus lea smávva čájáhus ja multivišuvdnaovdanbuktimat. Luonddustobuide beassá nuvttá sisa. Luonddustobuid rabasáiggit geassit 2011:
Leammi 13.6–18.9 dbm 9 - 17
Ohcejohka 13.6–11.9 dbm 10–20 ja 12.9–23.9 dbm 10–18

Gaskavahku máhccansáhttu Siiddas Avvilii ja Suoločielgái johtá maiddái geasi áigge. Anárii beassá Suoločielggis ja Avvilis fásta busseruvttuin. Lágiduvvon máhccansáhttu vuolgá Siidda šiljus gaskavahkuid diibmu 16.15. Máhccansáhtu fárrui galgá almmuhit iežas ovddit beaivve. Almmuhit sáhttá Suoločielggi hoteallaide, Guovddášvárrehahkii dahje Siidii. Lassedieđuid oažžu áššehasbálvalusas.

Buresboahtin geassemátkái Siidii!