Sámemusea Siida oažžu resurssaid sámi kulturbirrasa dikšumii

Oahpahus- ja kulturministeriija ruhtadan Sámi kulturbirasovttadat -fitnus Sámediggi, Musealágádus ja Lappi ELY-guovddáš dahket searválagaid doaibmamálle bissovažžan šaddi kulturbirasovttadahkii. Musealágádus sirdá Anárii sajáiduvvi ovttadahkii kulturbirrasa dikšumii guoskevaš eiseváldebargguid juo pilohttamuttus. Eiseváldebarggut gusket arkeologalaš kulturbirrasa gáhttemii sámiid ruovttuguovllus. Pilohttafidnui bálkáhuvvo arkeologa, guhte lea bures oahpásmuvvan sámeguovllu arkeologiijai ja kulturbirrasii.

EAKR:a ruhtadan Ealli biras – Elävä ympäristö -fidnu álgá oktanaga. Fidnui lea ožžojuvvon ruhtadeapmi Lappi Lihtu bokte ja dat bistá 2,5 jagi. Fitnu ulbmilin lea dahkat sámi kulturbirasprográmma sámeguvlui, dahkat kulturbirrasii guoskevaš lasseinvesteremiid, ollašuhttit čájáhusa sámi kulturduovdagis ja huksenárbbis sihke dahkat sámi kulturbirrasa dikšuma hálddahusmálle. Fitnu galgá leat jođiheamen sámi kulturbirrasii bures oahpásmuvvan prošeaktaplánejeaddji.

Sámemusea Siidda ulbmilin lea ovddidit musea doaimma nu, ahte sámekultuvrii guoskevaš museasuorgebarggut sirdašuvvet Sámemusea dikšunláhkai. Sámi kulturbirasovttadaga vuođđudeapmi doarju dán ulbmila ja ovddida sámi kulturiešstivrejumi ollašuvvama museasuorggi bargguid dikšumis.

Lassedieđut:
Museahoavda Tarmo Jomppanen, tel. 0400 167 806, tarmo.jomppanen(at)samimuseum.fi