Jeagelveaji sámedállu

Jeagelveaji sámedállu lea Ohcejotnjálmmi ja Njuorggáma gaskkamuttus Deatnogáttis. Birgenláhkin dálus lea leamaš guolástus ja šibitdoallu. Dan visttit leatge fiinna ovdamearka dain boares sámedáluin, main johkabivdu ja šibidoallu leat leamaš váldoáigáiboahtun.

Jeagelveajis lea ássojuvvon gitta 1970-logu álggu rádjai. Dát báiki lea hui guhká leamaš anus, ja dálu birrasiin orošedje vuhttomin mearkkat das ahte dakko livččii ássojuvvon juo máŋgačuođi jagi. Ánde Jovnnabárdni Warsi vuođđudii Jeagelveaji 1866:s áhčis lájuid ja árbevirolaš guollečáziid lahkosii. Dálu boares eallinvuogit ja ealáhusat vuhttojit ainge bures sihke dálu visttiin ja šilljobirrasa niittuin. Musealágádus osttii ávdimin šaddan dálu 1981:s ja vuosttas divodanbarggut álggahuvvojedje 1982:s. Dalle divvojuvvojedje earret eará váldovistti hirsaruŋgu ja árranat ja ráhkaduvvui lavdnjegáhttu áibbas ođđasit.  1990:s Jeagelveadjái ceggejuvvui maiddái sávdni dohko sirdojuvvon boares hirssain.

Jeagelveadji lea sirdásan dán jagi álggus Musealágádusas Meahciráđđehusa luonddubálvalusaide. Álgogeasis ordnegohte visttiid ja dáinna bargguin lea jotkojuvvon čakčat. Dán jagi bealde galggašedje divvojuvvot dat buot eanemus luoškkagan ráhkadusat, ja boahttevaš jagiid divodanbarggut joatkašuvvet. Huksenbargguid lassin Luoddubálvalusat lea kártehan Jeagelveaji šilljobirrasa šattolašvuođa. Ná fidnejuvvon dieđuid vuođul leat dál dahkamin šilljobirrasa dikšunplána. Boahtte gease šilljogietti lea jurdda láddjet  ja johkagátti suovka galggašii njáskojuvvot. Meahciráđđehusa luonddubálvalusat bargá Jeagelveaji divodanplána searválagaid Sámemusea Siiddain ja Musealágádusain.

Jagi 2014 geassemánu álggus Sámemusea Siidda arkeologa Eija Ojanlatva ja Meahciráđđehusa Lappi luonddubálvalusaid arkeologa Paula Pelttari kártiiga šilljobirrasa boares goahtesajiid ja vistevuođuid. Dán kártema vuođul gávdnojuvvojedje sullii 16 goahtesaji ja vistevuođu ovddit kártemiid vuođul dahkkojuvvon logahallamii. Jeagelveajis eai leat dahkkojuvvon arkeologalaš roggamat, muhto boarráseamos goahtesajit leat várra 1500–1600 -logus.

Jeagelveadji lea Musealágádusa juogusteami mielde mearkkašahtti huksejuvvon kulturbiras ja dat lea Deanu guolástanvieruin ja šibitdoalus muitaleaddji áidnalunddot sámedállu. Visttit leat ovddeštuvvon muitalit johkasámiid dállodoalus ja šilljobirrasii leat ceggejuvvon maiddái oahpistangalbbat, vai lea álkit oahpásmuvvat Jeagelveaji dállui.

Document Actions

GALLESTALLIID INFO

SIIDA
INARINTIE 46, 99870 ANÁR

Sámemusea
Tel. +358 (0)400 898 212

Luondduguovddáš, Meahciráđđehus
Tel. +358 (0)206 39 7740

 

Sajos

ISM-logo1

ILM.jpg

mapinari