Sámemusea prošeavttat

Dálá prošeavttat

Sámemusea Siidda oktavuhtii lea vuođđuduvvon Sámi kulturbirasovttadat álgojagis 2011. Ovttadaga vuođđudeami dahket vejolažžan guokte spesiálafitnu, Oahpahus- ja kulturministeriija ruhtadan Sámi kulturbirasovttadat -pilohttafidnu (21.2.2011 – 31.12.2013) ja EAKR:a ruhtadan Ealli biras – Elävä ympäristö -fidnu (1.3.2011 – 30.6.2013). Fitnuid váldoulbmilin lea oažžut ovttadaga bissovažžan.

Sámi kulturbirasovttadat

Sámi kulturbirasovttadat -fitnus bargá arkeologa Eija Ojanlatva, guhte dikšu sámeguovllu arkeologalaš kulturárbái guoskevaš eiseváldebargguid. Dáidda gullet ee. lávvaplánemii ja eará eanageavaheapmái guoskevaš áššit, cealkámušat ja báikkialdedárkkisteamit, sámeguovllus gávdnon diŋggaid ja áiccastagaid vuostáiváldin sihke dološmuittuid dikšun ja inventeren. Musealágádus ja Sámemusea leaba 1.1.2011 vuolláičállán ovttasbargosoahpamuša arkeologalaš kulturárbbi dikšumis, ja dat lea dahkan vejolažžan sirdit dáid doaimmaid sámeguvlui.

Ealli biras

Ealli biras -fitnus bargá  prošeaktakoordináhtor Päivi Magga. Fitnus dahkkojuvvo sámeguovllu várás sámi kulturbirasprográmma ja gárvvistuvvo čájáhus sámi kulturduovdagis ja huksenárbbis. Fitnu stivrenjoavkkus leat Sámediggi, Giellagas-instituhtta, Lappi kulturbirasprográmma -fidnu, Lappi ELY-guovddáš, Lappi lihttu, Meahciráđđehus, Musealágádus ja Sámemusea. Fitnu ruhtada EAKR – Eurohpá guovlluidovddidanfoanda ja dan ruhtadeaddjin riikkadásis lea Lappi Lihttu. Sámi kulturbirasovttadat doaibmá dan visttis, mii lea Siidda šilljobirrasis Juvdujoga gáttis musea buohta.

Oktavuođadieđut:
Arkeologa Eija Ojanlatva, Sámi kulturbirasovttadat -pilohttafidnu, eija.ojanlatva@samimuseum.fi, tel. +358 (0)40 167 6145
Prošeaktakoordináhtor Päivi Magga, Ealli biras – Elävä ympäristö -fidnu, paivi.magga@samimuseum.fi, tel. +358 (0)40 180 150

Interaktiivvalaš Sápmi

Sámi Oahpahusguovddáš lea ohcan fitnu, man váldoulbmilin lea skuvlet mediasuorggi máhttiid sámeguovllu mediadárbbuide: interaktiivvalaš media sisdoallobuvttadeaddjiid (mediabajásgeassin), animašuvdnateknologiija ja sosiálalaš media máhttiid. Fitnu oasseulbmilat leat: olahit buorebut sihke skuvlema ja sosiálalaš fálaldagaid dáfus sámemánáid ja -nuoraid sámeguovllu olggobealde, buoridit guovllu barggolašvuođavejolašvuođaid ja bargat dan ovdii, ahte nuorat gávdnet buorebut barggu sámeguovllus eaige dárbbaš fárret eará sadjái, ovddidit kultuvrra dovdamuša ja vurkenvejolašvuođaid ja ná dahkat buorebut dovddusin sámekultuvrra riikkadásis sihke buvttadit kulturoahpponeavvuid sámeguovllu dárbbuide.

Sámemusea Siida lea mielde dán fitnus nu, ahte lea vurkemin sámi kulturárbbi ja ovdanbuktimin dan ođđa mediakanálaid bokte. Musea ulbmilin lea seammás buoridit iežas bargoveaga ođđamediamáhtu. Fidnu ruhtaduvvo Nannán-Suoma ESR-prográmma Davvi-Suoma stuorraguovlooasi váriiguin. Fidnoáigi lea 1.8.2010 – 30.12.2012.

Lassedieđut:
Sámi oahpahusguovddáš, www.sogsakk.fi

Mannan prošeavttat

Sámenuorat (Samisk ungdom)

Davviriikalaš sámekultuvrra vurkejeaddji museaid oktasaš fitnu ulbmilin lea dokumenteret sámenuoraid eallima ovttasráđiid nuoraiguin.  Dokumenterenvuohkin leat ee. čuovgagovven ja/dahje videogovven sihke oktasaš bargobájit. Prošeavtta ulbmilin lea movttiidahttit nuoraid váikkuhit dasa, maid museat vurkejit iežaset čoakkáldagaide dálá sámekultuvrras. Suoma dokumenterenovttasbargoguoibmin doibmet guhtta  14-18-jahkásaš ng. citysámi. Fidnu lea álggahuvvon 1.5.2009 ja dat nohká jagi 2011 álggus.

Fitnu váldodoaibmin lea Ájtte - Svenskt fjäll- och samemuseum (Johkamohkki, Ruoŧŧa) ja prošeavttas vástideaba Ylva Jannok Nutti ja Anna Westman. Fidnobargoguoimmit leat: Várjjaga mearrasámemusea (Vuotnabahta, Norga), Saemien Sijte -searvi (Snåase, Norga), sihke Sámemusea Siida (Anár, Suopma). Fitnu ruhtaduvvo Interreg IV/A Nord –prográmma ruđaiguin.

Lassedieđut:
Intendeanta Arja Hartikainen, tel. +358 (0)40 579 3313, arja.hartikainen(at)samimuseum.fi, http://samiyouth.typo3konsult.se/